NAXÇIVAN MUXTAR RESPUBLİKASI
PARALİMPİYA FEDERASİYASI
Şərur rayonunda bədən tərbiyəsi və idmanın sağlamlıq imkanları məhdud şəxslərin reabilitasiyasındakı roluna dair maarifləndirici tədbir keçirilib
Tədbiri giriş sözü ilə açan Naxçıvan Muxtar Respublikası Gənclər və İdman Nazirliyinin şöbə müdiri Taleh İbrahimov, muxtar respublikada idmanın inkişafı istiqamətində görülən işlərdən, əldə olunan nəticələrdən danışıb. T.İbrahimov bu baxımdan, “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı”nın əhəmiyyətini xüsusi qeyd edib.
Daha sonra çıxış edən Paralimpiya Federasiyasının sədr müavini Vüqar Məmmədov bildirib ki, fiziki imkanları məhdud şəxslərin sağlamlıqlarının möhkəmləndirilməsi, onların cəmiyyətə inteqrasiyası baxımından idman mühüm əhəmiyyət daşıyır. Bu baxımdan əlilliyi olan şəxslərlə bağlı dövlət siyasətinin əsas prioritetlərindən biri kimi, onların, habelə sağlamlıq imkanları məhdud uşaqların idmana, paralimpiya idman növlərinə cəlbi diqqət mərkəzində saxlanılır. V.Məmmədov Federasiya tərəfindən bu istiqamətdə həyata keçirilən tədbirlərdən və qarşıya qoyulan vəzifələrdən bəhs edib.
Tədbirin davamında paralimiya idman növlərindən biri olan boccia üzrə məşqçi-müəllim Zaur Hüseynov və stolüstü tennis üzrə paralimpiyaçı Pünhan Səfərov, idmanın müvafiq kateqoriyalı şəxslərin həyatındakı əhəmiyyətindən danışıb, bu sahədəki təcrübələrini tədbir iştirakçıları ilə bölüşüblər. Maarifləndirici görüşdə həmçinin, sözügedən mövzuya dair slaydlar və videoçarxlar nümayiş etdirilib, müzakirələr, izahedici söhbətlər aparılıb.
Həmin gün, həmçinin Paralimpiya Federasiyanın Şərur rayonunda ağırlıqqaldırma üzrə yeni bölməsinin təqdimatı keçirilib, burada yaradılan şəraitlə bağlı tədbir iştirakçılarına məlumat verilib. Daha sonra, görüş iştirakçıları Federasiyanın Şərur rayonunda yerləşən stolüstü tennis bölməsi ilə də tanış olublar.
Qeyd edək ki, tədbirdə, 110 nəfərədək müvafiq kateqoriyadan olan şəxs və paralimpiyaçı idmançı iştirak edib. Bu kimi maarifləndirici görüşlərin muxtar respublikanın digər şəhər və rayonlarında da keçirilməsi nəzərdə tutulub.
Culfa rayonunda sağlamlıq imkanları məhdud 18 yaşadək uşaqlar arasında Boccia idman növü üzrə rayon birinciliyi keçirilmişdir.
19 oktyabr 2021-ci il tarixdə Culfa şəhər 2 №-li tam orta məktəbinin idman zalında Culfa Rayon İcra Hakimiyyəti, Naxçıvan Muxtar Respublikası Paralimpiya Federasiyasının Culfa rayon bölməsi və Culfa rayon Gənclər və İdman idarəsinin birgə təşkilaçılığı ilə sağlamlıq imkanları məhdud 18 yaşadək uşaqlar arasında Boccia idman növü üzrə rayon birinciliyi keçirilmişdir. Birincilikdə 11 sağlamlıq imkanları məhdud uşaq iştirak edib.
Yekun nəticədə Rayon paralimpiyaçılarından Məmmədov Elcan Əjdər oğlu I yerə, Əsədli Əli Elbrus oğlu II yerə, Mürsəlli Cəlal Elmar oğlu III yerə, layiq görülmüşdür.Qalib və fərqlənən paralimpiyaçılara diplomlar və qiymətli hədiyyələr təqdim olunmuşdur.
Ordubad rayonunda sağlamlıq imkanıları məhdud 18 yaşadək uşaqlar arasında yüngül atletika idman növü üzrə rayon birinciliyi keçirilmişdir
08 oktyabr 2021-ci il tarixdə Ordubad şəhər idman stadionunda Naxçıvan Muxtar Respublikası Paralimpiya Federasiyasının Ordubad rayon bölməsi və Ordubad rayon Gənclər və İdman idarəsinin birgə təşkilatçılığı ilə sağlamlıq imkanıları məhdud 18 yaşadək uşaqlar arasında yüngül atletika idman növü üzrə rayon birinciliyi keçirilmişdir. Birincilikdə 14 sağlamlıq imkanları məhdud uşaq iştirak edib. Yekun nəticədə Rayon paralimpiyaçılardan 100 metr məsafəyə qaçış üzrə Sadıqlı Səlim Şövqü oğlu I yerə ,Məmmədəliyev İslam Turab oğlu II yerə, Babayev Murad Xəyal oğlu III yerə .200 metr məsafəyə qaçış
üzrə Bağırov Məhəmməd Yaqub oğlu I yerə, Həbibov Əsgər Tural oğlu II yerə, Məmmədov Cəsur Qulu oğlu III yerə layiq görülmüşdür. Qalib və fərqlənən paralimpiyaçılara diplomlar təqdim olunmuşdur.
Sağlamlıq imkanları məhdud 18 yaşadək uşaqlar arasında şahmat üzrə birincilik keçirilmişdir
14 oktyabr 2021-ci il tarixdə Naxçıvan Şahmat Mərkəzində Naxçıvan Muxtar Respublikası Gənclər və İdman Nazirliyinin, Paralimpiya və Şahmat federasiyalarının birgə təşkilatçılığı ilə sağlamlıq imkanları məhdud 18 yaşadək uşaqlar arasında şahmat üzrə birincilik keçirilmişdir. Yarışın keçirilməsində məqsəd fiziki imkanları məhdud şəxslərin asudə vaxtının səmərəli təşkili, şahmat idman növünə marağın artırılması, bu qəbildən olan şəxslər arasında şahmat idman növünün inkişaf etdirilməsi və onların cəmiyyətə inteqrasiyasını sürətləndirməkdən ibarətdir. 20 paralimpiyaçının iştirak etdiyi birincilikdə Nağıyev Turan I yerə, Cəfərli Anar II yerə, Novruzov Hüseyn III yerə layiq görülüblər. İlk üçlükdə qərarlaşan idmançılara pul mükafatı və diplom, digər iştirakçılara isə təşkilatçıların diplom və hədiyyələri təqdim olunub.
Azərbaycan Milli Paralimpiya Komitəsinin stolüstü tennis üzrə milli komandasının baş məşqçisi Naxçıvana dəvət olunub
Bu gün muxtar respublikada gənclərin idmana cəlbi, onlara sağlam həyat tərzinin aşılanması daim diqqət mərkəzində saxlanılır. Reabilitasiyanın bir növü kimi fiziki imkanları məhdud şəxslərin sağlamlıqlarının möhkəmləndirilməsi, onların cəmiyyətə inteqrasiyası baxımından idman mühüm əhəmiyyət daşıyır. Bu məqsədlə, Naxçıvan Muxtar Respublikası Paralimpiya Federasiyası tərəfindən məhdud fiziki imkanlı şəxslərin idman həyatına inteqrasiyası, istedadlı idmançıların aşkara çıxarılması üçün davamlı tədbirlər həyata keçirir, onların iştirakı ilə idmanın müxtəlif növləri üzrə yarışlar təşkil edilir. Ötən dövr ərzində paralimpiya idman növləri üzrə muxtar respublikada Federasiya tərəfindən bir sıra tədbirlər həyata keçirilib, bölmələr müvafiq vəsaitlərlə təmin edilib. Eyni zamanda, Paralimpiya Federasiyasının dəvəti ilə Azərbaycan Milli Paralimpiya Komitəsinin məşqçilər heyəti muxtar respublikaya dəvət olunub, onların iştirakı ilə məşqçi-müəllim və idmançı heyəti üçün təlimlər, onlayn seminarlar təşkil olunub.
Bu tədbirlərin davamı olaraq, sağlamlıq imkanları məhdud şəxslərin asudə vaxtlarının səmərəli təşkili və idman bacarıqlarının inkişaf etdirilməsi məqsədilə oktyabrın 13-də Azərbaycan Milli Paralimpiya Komitəsinin stolüstü tennis üzrə milli komandasının baş məşqçisi Ruqiyyə Qubuşova və məşqçi Əkbər Qubuşovun iştirakı ilə muxtar respublikada stolüstü tennis ilə məşğul olan paralimpiyaçılar üçün təlim keçirilib. Təlimdə iştirakçılara müxtəlif məşq prosesləri haqqında müvafiq tövsiyyələr verilib, zəruri hallarda praktiki icra olunub. Muxtar respublikada müvafiq idman növü üzrə paralimpiyaçı məşqçi-müəllimlərin də iştirak etdiyi tədbirdə idmançılara stolüstü tennis üzrə hazırlıq üsulları və oyun qaydaları haqqında zəruri informasiyalar verilib, bu mövzuda müzakirələr aparılıb.
Naxçıvan Muxtar Respublikası Gənclər və İdman naziri Ramil Hacı və Paralimpiya Federasiyasının sədri Nicat Babayev də tədbirdə iştirak edərək, təlim-məşq prosesini izləyib, idmançıların qayğıları ilə maraqlanıblar. Qeyd edək ki, seminarın sonunda Azərbaycan Milli Paralimpiya Komitəsinin stolüstü tennis üzrə uşaq milli komandasının baş məşqçisi Ruqiyyə Qubuşovaya xatirə hədiyyəsi və təşəkkürnamə təqdim olunub.
