NAXÇIVAN MUXTAR RESPUBLİKASI
PARALİMPİYA FEDERASİYASI
Babək rayonunda sağlamlıq imkanları məhdud uşaqlar arasında boccia yarışı keçirilib
Babək rayonunda sağlamlıq imkanları məhdud uşaqlar arasında boccia yarışı keçirilib
Babək Rayon Gənclər və İdman İdarəsi və Naxçıvan Paralimpiya Federasiyasının Babək rayon bölməsinin birgə təşkilatçılığı ilə yaşı 18-dək olan sağlamlıq imkanları məhdud uşaqlar arasında boccia üzrə rayon birinciliyi reallaşıb. Babək şəhər 1 nömrəli tam orta məktəbin idman zalında keçirilən yarışda 8 idmançı iştirak edib.
Olimpiya sistemi üzrə keçirilən birinciliyin yekun nəticələrinə əsasən, Zəka Abdullazadə 1-ci yerə layiq görülüb. Yusif İsmayılov yarışı 2-ci, Yunis Məmmədov isə 3-cü sırada tamamlayıb.
İlk üçlük və həvəsləndirici yerlərdə qərarlaşanlara diplom və qiymətli hədiyyələr təqdim edilib.
Vətən müharibəsi iştirakçıları atıcılıq yarışında iştirak ediblər
Naxçıvan Atıcılıq Mərkəzində paralimpiyaçılar arasında atıcılığın stend növü üzrə muxtar respublika açıq birinciliyi keçirilib. İştirakçılar arasında qazilərimiz də olub. Yarışa ümumilikdə 16 nəfər qatılıb. Nəticələrə əsasən Şəmsəddin Əsədov birinci olub. İlk üçlüyü müvafiq ardıcıllıqla Asəf Süleymanovla Elvin Quliyev tamamlayıblar. Mükafatlandırma mərasimində çıxış edən Gənclər və idman naziri Ramil Hacı, Paralimpiya Federasiyasının sədri Nicat Babayev və Atıcılıq Federasiyasının sədri Səhət Həbibbəyli yarışın əhəmiyyəti barədə danışıb, iştirakçılara uğurlar arzu ediblər. Qeyd olunub ki, bu kimi tədbirlər bundan sonra da davam etdiriləcək. Yekunda iştirakçılara diplom, kubok və hədiyyələr təqdim edilib. Yarış Naxçıvan Muxtar Respublikası Gənclər və İdman Nazirliyi, Atıcılıq və Paralimpiya federasiyaları tərəfindən birgə təşkil olunub.
Paralimpiyaçıların üzgüçülük üzrə muxtar respublika birinciliyi
Sağlamlıq imkanları məhdud 18 yaşadək oğlan və qızlar arasında keçirilən birincilik Naxçıvan Şəhər Üzgüçülük Mərkəzində reallaşıb. Gənclər və İdman Nazirliyi ilə Paralimpiya Federasiyasının birgə təşkil etdiyi yarışda 13 paralimpiyaçı iştirak edib. Məqsəd sağlamlıq imkanları məhdud uşaq və gənclərin reabilitasiyası, asudə vaxtlarının idmanla dəyərləndirilməsi və üzgüçülük idman növündə inkişaf etmələrinə zəmin yaradılması olub.
İştirakçılar üzgüçülüyün sərbəst üsulu ilə 25 metrlik məsafədə yarışıblar. Təyin olunan məsafəni digərlərindən daha tez qət edən Zeynəb İbrahimli qızlar arasında muxtar respublika birincisi olub. Səkinə Rəhimli ikinci, Nurgül Müslümova isə üçüncü olub. Oğlanlar arasında ən yaxşı nəticə Fərid Qafarlıya məxsus olub. Röyal Mahmudlu ikinci yerdə qərarlaşıb. Sıralamada ilk üçlüyü tamamlayan iştirakçı Zakir Həsənov olub.
İlk üçlükdə qərarlaşan paralimpiyaçılar diplomla təltif olunublar. Birinciliyin bütün iştirakçılarına hədiyyə təqdim edilib.
Kəngərlidə dart idman növü üzrə rayon birinciliyi keçirilib
Yaşı 18-dək olan sağlamlıq imkanları məhdud uşaqlar arasında keçirilən birincilik Qıvraq qəsəbə tam orta məktəbində reallaşıb. Gənclər və idman idarəsi ilə Paralimpiya Federasiyasının rayon bölməsi tərəfindən birgə təşkil edilən yarışda 14 paralimpiyaçı iştirak edib. Məqsəd sağlamlıq imkanları məhdud uşaq və gənclərin idmana cəlbi, onların reabilitasiyası və asudə vaxtlarının səmərəli təşkilindən ibarət olub.
Nəticələrə əsasən, Fatimə Həsənova ən yaxşı göstərici ilə qalib olub. Əlövsəd Hacılı və Nurlana Hüseynquliyeva müvafiq olaraq ikinci, üçüncü pillələrdə qərarlaşıblar.
Yarışın sonunda iştirakçıların hər birinə diplom təqdim edilib.
Bocciaçılar arasında yoldaşlıq görüşü keçirilib
12 Avqust – Beynəlxalq Gənclər Günü ilə bağlı təsdiq olunan tədbirlər planına uyğun olaraq keçirilən görüş Uşaq Bərpa Mərkəzində reallaşıb. Oyunda “Babək” və “Culfa” komandalarından yaşı 18-dək olan 8 paralimpiyaçı iştirak edib.
Naxçıvan MR Gənclər və İdman Nazirliyi ilə Paralimpiya Federasiyasının birgə təşkil etdiyi yoldaşlıq görüşü sağlamlıq imkanları məhdud uşaq və yeniyetmələrin reabilitasiyası, onların idmana cəlbi və bocciaya olan maraqlarının yüksəldilməsi məqsədilə keçirilib.
Nəticələrə əsasən, ümumi hesabda 2:0 hesablı üstünlük əldə edən Babək idmançıları görüşün qalibi olub. Sonda bütün idmançılara hədiyyələr təqdim olunub.
