NAXÇIVAN MUXTAR RESPUBLİKASI
PARALİMPİYA FEDERASİYASI
20.05.2022 Muxtar respublika paralimpiyaçısı Qolbol üzrə Azərbaycan milli komandasının heyətində təlim-məşq toplanışında iştirak edir.
Fiziki imkanları məhdud şəxslərin sağlamlıqlarının möhkəmləndirilməsi, onların cəmiyyətə inteqrasiyası baxımından idman mühüm əhəmiyyət daşıyır. Bu baxımdan əlilliyi olan şəxslərin, habelə sağlamlıq imkanları məhdud uşaqların paralimpiya idman növlərinə cəlbi diqqət mərkəzində saxlanılır. Bu məqsədlə, Naxçıvan Muxtar Respublikası Paralimpiya Federasiyası tərəfindən müxtəlif idman yarışları, maarifləndirici tədbirlər keçirilir, respublika və beynəlxalq miqyaslı yarışlarda muxtar respublika təmsilçilərinin iştirakına xüsusi önəm verilir. Görülən işlər son dövrlərdə öz uğurlu nəticələrini göstərməkdədir. Artıq muxtar respublika paralimpiyaçıları müxtəlif respublika səviyyəli yarışlarda yüksək nəticələr göstərməklə yanaşı, Azərbaycan milli komandalarının heyətinə də mütəmadi cəlb olunurlar.
Hazırda, Federasiyanın Qolbol idman növü üzrə paralimpiyaçısı Qəzənfər Zamanov milli komandanın heyətində İran İslam Respublikasında təlim-məşq toplanışında iştirak edir. May ayının 21-dək davam edəcək təlim məşq prosesləri zamanı idmançıların beynəlxalq yarışlara hazırlığı yoxlanılır, bu istiqamətdə idmançılara müvafiq tövsiyə və tapşırıqlar verilir.
Qeyd edək ki, ötən il də Qolbol idman növü üzrə Azərbaycan milli komandasının təlim-məşq toplanışına muxtar respublikadan paralimpiyaçı idmançılar və məşqçi-müəllim dəvət olunmuşdur.
