NAXÇIVAN MUXTAR RESPUBLİKASI
PARALİMPİYA FEDERASİYASI
Sağlamlıq imkanları məhdud 18 yaşadək uşaqlar arasında qaçış üzrə Naxçıvan Muxtar Respublika birinciliyi keçirilib.
Muxtar Respublika Stadionunda reallaşan birincilikdə sağlamlıq imkanları məhdud 18 yaşadək olan 24 paralimpiyaçı iştirak edib. Yarış sağlamlıq imkanları məhdud uşaqların reabilitasiyası, onların idmana cəlbi və paralimpiyaçılardan ibarət atletika üzrə yığma komandanın tərkibini müəyyən etmək məqsədilə keçirilib.
Nəticələrə əsasən, 100 metr məsafəyə qaçış üzrə ən yaxşı göstəriciyə Cəlal Mursəlli nail olub. Tural Abbasov finiş xəttinə ikinci çatıb. Məhəmməd Bağırov isə üçüncü olub. 200 metr məsafədə bütün rəqiblərini qabaqlayan Elşən Hüseynov qalib adına layiq görülüb. Əli İsayevlə İbrahim Tağıyev müvafiq olaraq ikinci, üçüncü sıralarda qərarlaşıblar.
Naxçıvan MR Gənclər və İdman Nazirliyi ilə Paralimpiya Federasiyasının birgə təşkil etdiyi birinciliyin sonunda ilk üçlükdəki idmançılar diplom və hədiyyələrlə mükafatlandırılıblar. Digərlərinə isə fəal iştiraka görə fəxri fərmanlar təqdim olunub.
